बाप्पा मोरया रे!

तू आहेस यावर माझा विश्वास आहे,

आता तू कुठे आहेस हे सांगणे कठीण.

जळी स्थळी पाषाणी नक्की आहेसच!

त्या शिवाय हा निसर्ग 

आम्ही कसा पाहिला, अनुभवला असता? 

ह्या निसर्गाची प्रेमळ व रुद्र रुपाची प्रचीती

म्हणजेच तू आहेस!

ह्या अनेक रूपात तुझे दर्शन घेताना

प्रेम, थोडी भीती, आदर,

अशा भावनांचे समिश्रण वादळ थैमान घालते.

तुला कोठे पाहावे, शोधावे. 

ह्याचा उलगडा मी माझ्या परीने सोडविलाय!

सामोरे येणारे काहीही 

मनुष्य प्राणी,जीव जीवाणू, 

अचल वस्तू, निसर्ग! 

ह्या सर्वात तू आहेस,

हे मान्य करून मी जेव्हा एकटा असतो, 

तेव्हा माझ्यातील आत्मविश्वास म्हणजेच तू! 

हे मी चांगले हेरले आहे.

त्या बळावर आज तू मला भरपूर काही दिले आहेस. 

त्या बरोबर महत्वाची मनशांती पण  दिली आहेस.

असो आज तुझ्या एका रूपाचा

आम्ही मानव उदो उदो करतो

तेव्हां...

गणपती बाप्पा मोरया!!